Хаттар:

Ассаламу Iалайкум! Зуда ялийначу хенахь иза йоI-стаг йолчура дIайолучу хенахь, цуьнан цIий долуш хила деза йа ца деза?

Жоп:

БисмиллахIир-рохьманир-рохьим

Ва Iалайкум ассалам ва рохьматуллахIи ва баракатухI!

Зуда маре йахача, цуьнан шен майрачуьнца доьххьаралера эвхьаза гIуллакх хуьлучу хенахь, иза йоI-стаг йолчура йо́лучу хенахь цуьнан цIий далар даим хила деза аьлла дац. Цхьайолчу хенахь и цIий да́ла а мега, цхьайолчу хенахь ца да́ла а мега.

Хууш ма-хиллара, и цIий далар зуьдчуьнан бехкеметтигца хуьлуш долу «йоIстогаллин пардо» хадар бахьана долуш хуьлу. Лоьраша дийцарехь, и оцу бахьанийца до́луш долу и цIий дукха ца хуьлу, цхьа тIадам, йа ши тIадам хуьлу. ТIаккха, эвхьаза гIуллакх хуьлучу хенахь арайолучу борша стеган ораллийца а, зудчуьнан тIуналлийца а дIаоь и тIадамаш, и бахьана долуш оцу шинан тIуналлин бос цIечу басе боьрзу, цундела и ерриге тIуналлаш цIий долуш санна хета. Ткъа и цхьа тIадам, йа ши тIадам бен доцу цIий оцу тIуналлашца дIа ца ийчи, иза цхьанна а гойла дац, йа тидам боцуш дисса мега иза.

Вукху агIор, лоьраша шайна зеделлачуьнца дийцарехь, зудчуьнан и пардо озалуш хила а тарло, цундела, эвхьаза юкъаметтиг хилча а иза хада ца хада а мега. Ткъа и хада ца хаьдча, и цIий долийла яц, цхьа кхин чов хилла яцахь. Цундела, цхьадолчу хьолашкахь хила тарлуш ду, и пардо хаьдда а доцуш, (иза хаьдда ца хилар бахьана долуш цIий даьлла а доцуш), борша стеган ораллин дакъош зудчуьнан берацIачу а кхаьчна, иза пхьор йолар!!! [1]

Кхин а, и пардо дIада́ларан кхидолу бахьанаш вай дийцича – охьакхетар бахьана долуш дIада́ла а йиш ю иза, зудчуьнан хьайд хилар бахьана долуш дIадала а йиш ю иза, авари йарца дIадала а йиш ю, лами тIера чукхетарца дIада́ла а йиш ю иза, иштта кхидолчу бахьанашца дIадаьлла хила а йиш ю иза. Ткъа, доьххьара вай ма-аллара, иза дIадаьлла хилча цIий долийла яц.

Цундела хаа деза, зудчуьнан и пардо ца хилар а, йа цуьнан доьххьара буьйсанна цIий ца да́лар а цхьанне агIор цунах лаьцна вон ойла кхоллаялийта могуьйтуш долу бахьана доций. Iелам-наха ма-аллара, доьххьара эвхьаза юкъаметтиг хилча зудчуьнан цIий ца даьллера аьлла цу зудчунна тIе цхьа цIе кхолла мегар дац, йа цо цхьа хьарамло лелийна мотта а мегар дац, хIунда аьлча пардо долуш хилар а, йа иза доцуш хилар а, иштта цIий да́лар а, йа иза ца да́лар а, йа Къуръано а, йа Суннато а, йа Iелам-наха а хIоттийна тешалла а, бахьана а дац зуда цIена хиларна а, йа ца хиларна а.[2]

Ткъа дика хуург сийлахь АллахI ву!

24.10.2009