|
|
|
БисмиллахIиррохьманиррохьим Ва Iалайкум ассалам ва рохьматуллахIи ва баракатухI! Ахь ма-баххара долчух лаьцна деана хIумма а ду аьлла суна гина дац. Делахь а, цу хаттарх тера хила мегаш ши хьадис ду суннатехь деана. 1. «Хийра махкахь валар – гIазот (шахIид) хилар ду».[1] ХIара хьадис нийса делхьара, шен махкахь воцуш кхечу махкахь валаран дозалла гойтуш хир дара иза, делахь а иза гIийла хьадис ду аьлла хьадисан Iелам-наха.[2] 2. «ЦIеххьана валар – оьгIазлонца дIаиэцар ду».[3] «ЦIеххьана валар – муъма-стагана (баккъалла а АллахIах тешаш хиллачунна) паргIато а ю, вочу стагана оьгIазлонца дIаиэцар а ду».[4] ХIокху шина хьадисах доьххьаралера хьадисехь Пайхамара – Делера салават а, салам а хуьлда цунна – довзуьйту вайна, стаг цIеххьана валар – масала дог сецна, йа цхьана хIуманах дIакхетта – иза АллахIан оьгIазлонан билгало хилар. ШолгIачу хьадисо – иза гIийла лоруш делахь а – довзуьйту вайна шена и оьгIазло хилларг вон стан вуй. Вуьшта аьлча, цхьа стаг вон хиллехь, иза новкъахь воьдуш лаьтташехь цIеххьана валар – Делан оьгIазлонан билгало ю, хIунда аьлча, тоба дан а, шахIа́дат да́ло́ а, весет дан а, иштта кхидолу дика хIума дан а ца ларош валар нисдолуьйту цуьнан Дала. Амма иштта цIеххьана велла стаг дика хиллехь, даим валар дагахь долуш хиллехь, даим валарна кечам бина хиллехь – иштта валар цунна паргIато ю.[5] Дикчу стагана иза паргIато хиларан бахьана хила мега валаран халонех иза кIелхьара валар. Дала вочу чаккхенах а, вочу даларх а лардойла вай а, массо бусалба нах а. Ткъа дика хуург АллахI ву!
25.09.2008 [1] Имам Ас-Суйу́тIий, «Ал-ДжáмиIиссогIúр». [2] «Ат-Талхи́сул-Хьаби́р», Хьафиз Ибн Хьаджар; «Ал-Бадрул-Муни́р», Имам Ибнул-Мулаккъин; «Ас-Силсилатуд-ДаIи́фахI», Шейх Ал-Албáнú. [3] Абу Давуд, Ахьмад. [4] Ахьмад, БайхIакъий. [5] «Фатхьул-Ба́ри́», Хьафиз Ибн Хьаджар, 3/255; «Шархь Сунан Аби́ Давуд», Шейх Iабдул-Мухьсин Ал-Iаббáд, 16/406.
|