Ассаламу Iалайкум! Цхьацца жайнашкахь яздина го суна, интернет чохь яздина го суна хIара элпаш яздеш (с.а.в.), Пайхамара цIе яьккхича, Делера къинхетам, салам хуьлда цунна. И иштта яздар муха ду?

БисмиллахIиррохьманиррохьим

Ва Iалайкум ассалам ва рохьматуллахIи ва баракатухI!

Пайхамаран – Делера салават а, салам а хуьлда цунна – цIе яьккхича, йа иза хьахийча, цунна салават диллар а, цунна маршалла дехар а АллахIан омрунна а, Пайхамаран – Делера салават а, салам а хуьлда цунна – омрунна а муьтIахь хилар ду.

Лекха хинволчу АллахIа аьлла: [Бакъдолуш, АллахIа а, Цуьнан малийкаша а салават дуьллу пайхамарна; хIай ийман диллинарш, аш салават дуьллийла цунна, маршалла а доьхийла цунна].[1]

Пайхамара – Делера салават а, салам а хуьлда цунна – аьлла: «Суна цхьа салават диллинчунна АллахIа итт салават дуьллур ду».[2]

Кхечу хьадисехь аьлла ду: «БIаьрмециг ву, шена гергахь со хьахош хезча суна салават ца диллинарг».[3] 

Пайхамаран – Делера салават а, салам а хуьлда цунна – цIе язйеш хилча, йа иза пайхамар аьлла, элча аьлла хьахош хилча, цунна салават диллар ша́ ма-дарра дIаязде олу Iелам-наха, дешнийн доьххьара элпашца доцца а ца яздеш.

Иштта доцца и элпаш яздар гIалат ду, Пайхамарна къинхетам а, хастор а, маршалла а доьхуш ден доIа дерриге ша ма-дарра яздар нийса ду, иза мел хала делахь а.

Хьадис Iилманах лаьцна Имам Нававийс яздинчу «Ат-Такъри́б» жайнин маьIна деш, Имам Суйу́тIийс – Дала къинхетам бойла цаьршиннах шиннех – аьлла: «Дика лоруш дац салават а, салам а яздеш хилча цхьана элпаца, йа шина элпаца яздар, масала цхьаболчара «слIм» (дмхц) яздаре терра. Муххале а, кхоччуш дерриге дIаяздан деза и дешнаш. Доьххьара цу дешнашна «слIм» яздинчуьнан куьг дIаха́дийна хилла олуш ду».[4]

Имам Ибн Хьаджар Ал-ХIайтамийс – Дала къинхетам бойла цунах – аьлла: «АллахIан элчанан цIе яьккхинчул тIаьхьа хIара дешнаш  яздан деза: «АллахIера салават (къинхетам, хастор, даккхий диканаш) а, маршалла а хьулда цунна». Иза иштта яздар хьалха хилла болчу а, тIаьхьа хилла болчу а дикчу нехан, Iелам-нехан Iадат ду. Иза дацдан мегар дац элпашца, «слIм»[5] яздина дитарца, хIунда аьлча иза де́къазачеран Iадат ду».[6]

Ткъа дика хуург сийлахь АллахI ву!