Хаттар:

Ассаламу Iалайкум! Буьйсанна 2 даьлча деш долчу ламазах хIун олу хаа лууш вара со.

Жоп:

БисмиллахIир-рохьманир-рохьим

Ва Iалайкум ассалам ва рохьматуллахIи ва баракатухI!

Цунах Iуьйкъа ламаз олу вайн маттахь, «тахIадджуд», йа «къийа́мул-лайл», йа «сола́тул-лайл» олу Iаьрбийн маттахь. «ТахIадджуд» - вижинчура хьалагIаьттича бохург ду, «къийа́мул-лайл» - буьйса ламазехь яккхар бохург ду, «сола́тул-лайл» - буьйсанан ламаз бохург ду.

Цуьнан уггар дика хан муьлхург ю аьлча – Имам Нававийс (Дала къинхетам бойла цунах) аьлла:

«Буьйсанна деш долу ме́ла ламаз дезох ду дийнахь дечу ме́ла ламазал. Буьйсанан шина декъах цхьа дакъа ламаз деш яккха лаахь – шолгIа дакъа дезох ду.

Буьйса кхаа декъе екъа лаахь – юккъера дакъа дезох ду.

Цул а деза ду буьйса ялх декъе екъа а екъна, цу ялх декъах доьалгIачу а, пхоьалгIачу шина декъехь ламаз дар. Иза шина «Сахьихь» тIехь деана ду иштта).

Ерриге буьйса даим ламаз деш яккхар «макрухI» (ца дича мел а болуш, дича къа а доцуш хIума) ду.

КIеззиг бен ца дахь а, буьйсанна ламаз дан хьажар дика ду.

Ме́ла ламаз шен хIусам чохь дар дезох ду, маьждигехь дечул а».[1]

Делан Элчано – Делера салават а, салам а хуьлда цунна – аьлла: «АллахIана уггар дукха дезаш долу ламаз Давудан ламаз ду: ах буьйсанна наб еш хилла цо, (тIаккха) буьйсанан кхоалгIа дакъа ламаз деш доккхуш хилла цо, (тIаккха) буьйсанан ялхолгIа дакъа (диссича) наб еш хилла цо».[2]

Дика хуург сийлахь АллахI ву.

04.11.2009